पेटालिङ जाया । मलेसियाको पेटालिङ जया क्षेत्रमा अवस्थित एक मोल्ड निर्माण कम्पनीमा कार्यरत विदेशी श्रमिकहरूले फेरि हड्ताल गर्ने चेतावनी दिएका छन्।
कामदारहरूले उनीहरूको तलब, आवासीय सुविधा, र कार्यस्थलमा मानव अधिकारको उल्लंघन भएको भन्दै असन्तुष्टि जनाएका छन्। यसअघि पनि उनीहरूले यस्तै माग राख्दै हड्ताल गरेका थिए, तर कम्पनीले तत्काल समाधान नगरेको उनीहरूको गुनासो छ।
कामदारहरूका अनुसार कम्पनीले समयमै तलब नदिने, अतिरिक्त कामको उचित भुक्तानी नगर्ने, र बासस्थानमा अत्यधिक भीडभाड र अस्वस्थकर अवस्था रहेको छ।
हड्तालको तयारीका विषयमा जानकारी दिँदै कामदार प्रतिनिधिहरूले भने, “हामीले बारम्बार आवाज उठायौं, तर कुनै सुधार भएन। अब हामी फेरि संगठित रूपमा हड्तालमा जान बाध्य छौं।”
कम्पनी प्रशासनले भने समस्या समाधानका लागि छलफल भइरहेको प्रतिक्रिया दिएको छ। यस घटनाले विदेशी श्रमिकहरूको अवस्था, कार्य वातावरण, र रोजगारदाताको जिम्मेवारीबारे पुनः चासो बढाएको छ।
