काठमाडौँ | जेठ, २०८२
गैरआवासीय नेपाली संघ (एनआरएनए) ले नेपाल सरकारद्वारा प्रस्तुत आर्थिक वर्ष २०८२/०८३ को बजेटलाई स्वागत गरेको छ।
उपप्रधान तथा अर्थमन्त्री विष्णु पौडेलले बिहीबार सङ्घीय संसद्को संयुक्त बैठकमा प्रस्तुत गरेको बजेटप्रति संघले सकारात्मक प्रतिक्रिया जनाएको हो। एनआरएनए आइसिसीका महासचिव बी.आर. लामाद्वारा जारी विज्ञप्तिमा बजेटमा गैरआवासीय नेपालीहरूलाई धितोपत्रको दोस्रो बजारमा कारोबार गर्ने व्यवस्थालाई विशेषरूपमा स्वागत गरिएको उल्लेख छ।
पुँजी बजारमा एनआरएनहरूको सहभागिता
“यो व्यवस्थाले विदेशमा रहेका नेपाली मूलका व्यक्तिहरू र गैरआवासीय नेपाली नागरिकहरूलाई नेपालको पुँजी बजारमा सहभागी हुने अवसर प्रदान गर्छ। यसले विदेशी पुँजी भित्र्याउन र शेयर बजारको गतिशीलता बढाउन योगदान पुर्याउनेछ,” — विज्ञप्तिमा उल्लेख छ।
संघका अनुसार, यो नीतिले बैंकिङ, पर्यटन, जलविद्युत् र अन्य क्षेत्रमा लगानी विस्तार गर्न सहयोग पुग्नेछ, जसले पुँजी बजारमा तरलता तथा आर्थिक स्थायित्व कायम गर्न सघाउने अपेक्षा गरिएको छ।
सरकारसँग सहकार्यको प्रतिबद्धता
एनआरएनएले बजेटमा समेटिएका सकारात्मक पक्षहरूको कार्यान्वयनका लागि संघ नेपाल सरकारसँग सहकार्य गर्न तत्पर रहेको जानकारी दिएको छ। साथै, प्रवासी नेपालीको ज्ञान, सीप, पुँजी, प्रविधि र सञ्जाललाई राष्ट्रिय विकासमा उपयोग गर्ने नीति र सङ्कटमा परेका नेपालीको उद्धार सम्बन्धी प्रावधानको पनि प्रशंसा गरिएको छ।
सम्बोधन हुन बाँकी विषयहरू
तर संघले केही महत्त्वपूर्ण विषयहरू अझै सम्बोधन हुन बाँकी रहेको भन्दै ध्यानाकर्षण गराएको छ। जसमा:
-
गैरआवासीय नेपाली नागरिकताको कार्यान्वयन
-
एनआरएनहरूलाई नेपाली सरह लगानी गर्ने व्यवस्था
-
प्रवासी श्रमिकको सम्मान, बीमा र सुरक्षा
यी विषयमा संघले नेपाल सरकारसँग निरन्तर संवाद र सहकार्य गरिरहने प्रतिबद्धता जनाएको छ।
“बजेटको प्रभावकारी कार्यान्वयनका लागि संघको सधैँ साथ र समर्थन रहनेछ,” – महासचिव लामाले जारी गरेको विज्ञप्तिमा उल्लेख छ।
