मस्को, १५ जुन २०२५ –
गैर आवासीय नेपाली संघ (एनआरएन) रुसले यस वर्षको एनआरएन डे तथा वार्षिक बनभोज कार्यक्रम मस्कोदेखि करिब १०० किलोमिटर टाढा रहेको इस्त्रा को रमणीय स्थलमा भव्य रूपमा सम्पन्न गरेको छ।
स्मरण रहोस्, इस्त्रा पिकनिक स्थल एनआरएनको स्थापना हुनु अघिदेखि नै यहाँ रहेका अग्रजहरूको विचार–विमर्श र मन्थन गर्ने थलोको रूपमा परिचित रहँदै आएको छ। एनआरएन स्थापनाको पूर्वसन्ध्यामा यही स्थलमा बसेर एनआरएन सम्बन्धी पहिलो पहलहरू तय भएको मानिन्छ। त्यसैको निरन्तरतामा एनआरएन रुसले जुन १२ लाई वार्षिक स्थापना दिवस को रूपमा मनाउँदै आएको छ। यसपटक उक्त कार्यक्रम १५ जुन २०२५ मा आयोजना गरिएको हो।
कार्यक्रममा सहभागीहरूको उत्साहजनक उपस्थिति रहेको थियो। आयोजकहरूले पूर्वअनुमानका लागि प्रयोग गरेको Google Form भरिएका व्यक्तिहरूमध्ये ९७% ले सहभागिता जनाएका थिए। केहीले व्यक्तिगत वा मौसमसम्बन्धी कारणले उपस्थित हुन नसके पनि कार्यक्रममा मौसमले भने पूर्ण साथ दिएको आयोजकहरूले बताएका छन्।
उल्लेखनीय उपस्थिति
कार्यक्रममा विशिष्ट पाहुनाका रूपमा उपस्थित थिए:
-
रुसका लागि नेपाली राजदूत महामहिम प्रा.डा. जंगबहादुर चौहान
-
तृतीय सचिव कसम पोखरेल
-
गैर आवासीय नेपाली संघका केन्द्रीय अध्यक्ष डा. बद्री केसी
-
नेपाल सरकारको लगानी बोर्डका CEO सुशील ज्ञवाली तथा उनको भ्रमण टोली
साथै एनआरएनए रुसका पदाधिकारीहरू, स्वयंसेवकहरू, र विभिन्न क्षेत्रबाट आएका रुसमा रहेका नेपालीहरूको उल्लेखनीय सहभागिता रहेको थियो।
खेलकुद र मनोरञ्जन
बनभोज कार्यक्रममा सहभागीहरूले नेपाली परिकारको स्वाद लिँदै विविध खेलकुदमा सहभागिता जनाए। फुटबल, भलिबल, डोरी तान्ने, चम्चा दौड, म्युजिकल चेयर जस्ता खेलहरू आयोजना गरिए, जसमा उत्कृष्ट प्रदर्शन गर्ने टोली तथा व्यक्तिहरूलाई कप, मेडल, नगद पुरस्कार र आकर्षक गिफ्ट ह्याम्पर वितरण गरिएको थियो।
प्रविधिको उपयोग र सदस्यता विस्तार
कार्यक्रममा SMART NRNA App मार्फत सदस्यता तथा नविकरणका लागि स्वयंसेवकहरू परिचालित गरिएका थिए। साथै, सहभागिहरूका लागि बस यात्रा र प्रवेशको पूर्ण व्यवस्थापन एनआरएन रुस द्वारा गरिएको थियो।
धन्यवाद ज्ञापन
कार्यक्रमको अन्त्यमा महासचिव तथा आयोजक समिति सदस्य सिताराम कटेल ‘मिलन’ ले कार्यक्रम सफल बनाउन योगदान पुर्याउने सबैलाई धन्यवाद ज्ञापन गर्दै भने: “हामी यस कार्यक्रमलाई सफल बनाउन आर्थिक सहयोग गर्ने, व्यवस्थापनमा खटिने आयोजक सदस्यहरू, स्वयंसेवकहरू तथा उपस्थित सम्पूर्ण नेपाली समुदायप्रति हार्दिक आभार प्रकट गर्न चाहन्छौं।”
यदि तपाईं रुसमा हुनुहुन्छ र नेपाली समुदायसँग आबद्ध हुन चाहनुहुन्छ भने, एनआरएन रुसद्वारा सञ्चालित WhatsApp समूहमा यस लिंक मार्फत सहभागी हुन सक्नुहुन्छ।
