काठमाडौं, असार ९ गते:
एएफसी महिला एसिया कप छनोट प्रतियोगिता खेल्न उज्बेकिस्तान प्रस्थान गर्न लागेको नेपाली राष्ट्रिय महिला फुटबल टोलीलाई आज अखिल नेपाल फुटबल संघ (एन्फा) ले एक विशेष समारोहबीच बिदाइ गरेको छ।
युवा तथा खेलकुद मन्त्रालयका सचिव डा. हरिप्रसाद लम्साल प्रमुख अतिथि रहेका कार्यक्रममा एन्फा अध्यक्ष पंकज विक्रम नेम्वाङ, उपाध्यक्ष दावा लामा, कार्यवाहक महासचिव दामोदर भट्टराई, केन्द्रीय सदस्य सरिला श्रेष्ठ, टिका लामा, र प्रमुख कार्यकारी अधिकृत इन्द्रमान तुलाधर लगायतका पदाधिकारीहरूले टोलीलाई शुभकामना दिँदै बिदाइ गरेका हुन्।
समारोहमा वक्ताहरूले नेपाली महिला फुटबल टोलीको मेहनत र प्रतिबद्धताको प्रशंसा गर्दै उज्बेकिस्तानमा हुने छनोट प्रतियोगितामा उत्कृष्ट प्रदर्शन गर्ने विश्वास व्यक्त गरेका थिए। टोलीलाई आत्मविश्वासका साथ प्रतिस्पर्धा गर्न र देशको नाम उच्च बनाउन प्रेरणा दिइएको थियो।
नेपालले उज्बेकिस्तानमा हुने छनोट चरणमा प्रतिस्पर्धी टोलीहरूसँग खेल्नेछ र एसिया कपमा स्थान बनाउनका लागि संघर्ष गर्नेछ। महिला टोलीको हालको तयारी र मनोबल उच्च रहेको बताइएको छ।
