सञ्जय मिश्रा
रौतहट १४ असार। राष्ट्रिय वृक्षारोपण दिवस २०८२ को विशेष अवसरमा रौतहटमा पनि बिभिन्न कार्यक्रमको आयोजना गरी मनाउनुका साथै १३ सय बिरुवा लगाईएको छ।
प्रदेश वन तथा वातावरण मन्त्रालय,अन्तर्गत वन तथा वातावरण महाशाखाको समन्वयमा रौतहटको चन्द्रपुर स्थित वृक्षारोपण दिवस मनाइएको हो। उक्त अवसरमा
वृक्षारोपण कार्य जनपक्षीय सामुदायिक वन उपभोक्ता समूह, चन्द्रपुर नगरपालिका ४ जुङी कोइरी छेउस्थित वन क्षेत्रमा १५०० बिरुवा रोपिएको छ। ५०० टिक, ३०० महागानी ३०० सतिसाल र २००ईमलीको बिरुवाहरू रोपिएको डिवीजन प्रमुख साहले जानकारी दिए।उक्त वृक्षारोपण कार्यले वातावरणीय सन्तुलन कायम राख्न मद्दत पुर्याउने विश्वास लिइएको छ। कार्यक्रममा सहभागीहरूले वृक्षारोपणसँगै वन संरक्षण तथा संवर्धनमा सहयोग पुर्याउने प्रतिबद्धता व्यक्त गरेका थिए।
कार्यक्रमको संयोजक डिभिजन वन कार्यालयका हेमन्त साहले बोल्दै रौतहट जिल्लामा हरियाली कायम गर्न तथा स्थानीयको जीवनस्तर उकास्न र बढ्दो तापक्रमलाई न्यूनीकरण गर्नको लागि वृक्षारोपण अत्यावश्यक रहेको बताए। डिभिजनल वन कार्यालयका अनुसार आगामी दिनमा समेत निरन्तर रूपमा वृक्षारोपण कार्यक्रम सञ्चालन गरिने जानकारी दिइएको छ।
वन अधिकृत साहको अध्यक्षता तथा जिल्ला प्रशासन कार्यालय चन्द्रनिगाहपुरका प्रमुख जिल्ला अधिकारी मनोज प्रभाकर अधिकारीको प्रमुख आतिथ्यतामा सम्पन्न भएको कार्यक्रममा सशस्त्र प्रहरी, नेपाल प्रहरी, डिभिजन वन कार्यालय, रौतहटका कर्मचारीहरू, सामुदायिक वन उपभोक्ता महासंघका प्रतिनिधिहरू, विभिन्न सामुदायिक वनका प्रतिनिधिहरू तथा स्थानीय जनप्रतिनिधिहरूको उल्लेखनीय उपस्थिति रहेको थियो।
नेपाल सरकार मन्त्रिपरिषदको अन्तराष्ट्रिय प्रतिवद्धताअनुसार प्रत्येक वर्ष असार १४ देखि २० गतेसम्म वृक्षारोपण सप्ताह मनाइने गरिन्छ। उक्त अवसरमा देशभर वृक्षारोपण कार्यक्रमहरू सञ्चालन गरिन्छ।
