पर्थ, पश्चिम अष्ट्रेलिया — आगामी NRNA Western Australia 2025–2027 कार्यकालको निर्वाचनलाई लक्षित गर्दै, बिनिता बर्तौला ले नारी निकुञ्जको महिला सदस्य पदमा उम्मेदवारी घोषणा गरेकी छिन्।
समुदायभित्र लामो समयदेखि सक्रिय रहँदै आएकी बिनिता बर्तौलाले विशेषगरी नेपाली महिला समुदायको सपना, संघर्ष र सम्भावनालाई केन्द्रमा राखेर नेतृत्वको प्रत्याभूति गर्ने प्रतिज्ञा गरेकी छिन्।
“जब महिलाहरू सशक्त हुन्छन्, समाज पनि सबल हुन्छ”
उनका अनुसार, “नेपाली महिला दिदीबहिनीहरूलाई आत्मनिर्भर बनाउने, उहाँहरूको आवाजलाई संस्थागत तहमा पुर्याउने र सहयोगी वातावरण निर्माण गर्ने मेरो प्राथमिक लक्ष्य हो।”
बिनिता बर्तौला विश्वास गर्छिन् — महिलाको समावेशीता, क्षमता विकास र सम्मानले मात्र दीगो प्रगति सम्भव छ।
प्रमुख प्रतिबद्धताहरू:
महिला सशक्तीकरण र सीप विकास
– रोजगारीमूलक तालिम, नेटवर्किङ कार्यक्रम र सचेतनामूलक कार्यशालाहरूमार्फत महिलाहरूलाई आत्मनिर्भर बनाउने।
नवआगन्तुक महिलाहरूको सहयोग
– विद्यार्थी तथा नवआगन्तुक महिलाहरूका लागि ‘सपोर्ट नेटवर्क’ निर्माण गरी उनीहरूको समस्यामा सहजीकरण गर्ने।
स्वास्थ्य र मानसिक स्वास्थ्यमा जागरूकता
– महिला स्वास्थ्य सम्बन्धी कार्यक्रमहरू सञ्चालन गर्दै, आवश्यक परामर्श सेवाको पहुँचमा सुधार ल्याउने।
सांस्कृतिक तथा सामाजिक सहभागिता प्रवर्द्धन
– नेपाली भाषा, कला र संस्कृति संरक्षणका कार्यक्रमहरू महिलाहरूको नेतृत्वमा आयोजना गर्ने।
एकता र सहकार्यमा आधारित कार्यशैली
– अन्य नेपाली संघसंस्थासँग सहकार्य गर्दै महिलाको हक र अधिकारका लागि साझा अभियान अघि बढाउने।
समुदायप्रतिको अपिल:
“म आफ्नो अनुभव, सेवाभाव र समर्पणमार्फत NRNA नारी निकुञ्जलाई अझ सशक्त र जीवन्त बनाउने प्रतिबद्धताका साथ उम्मेदवारी घोषणा गरेकी हुँ। तपाईंहरूको अमूल्य साथ र समर्थनले यो यात्रा सफल हुनेछ भन्नेमा म पूर्ण आशावादी छु।”
— बिनिता बर्तौला (Binita Barataula)
