डार्विन, अष्ट्रेलिया — आगामी कार्यकाल (२०२५–२०२७) का लागि गैर-आवासीय नेपाली संघ (NRNA) – नर्दन टेरिटोरी, अष्ट्रेलिया को कोषाध्यक्ष पदमा ईशान चौंलागाईंले आफ्नो उम्मेदवारी घोषणा गरेका छन्।
एनआरएनए एनटी युथ टिमका पूर्व सदस्य समेत रहेका चौंलागाईंले संस्थामा आफ्नो अनुभव, जवाफदेही नेतृत्व, पारदर्शिता र नवप्रवर्तनमूलक दृष्टिकोणको आधारमा समुदायलाई जिम्मेवारीसाथ सेवा गर्ने अठोट व्यक्त गरेका छन्।
उम्मेदवारी घोषणा गर्दै उनले भने, “म पदको लोभमा होइन, उद्देश्यका लागि सेवा गर्न आएको हुँ। मलाई विश्वास छ — जवाफदेही वित्तीय प्रणाली, युवामैत्री योजना र पारदर्शी नेतृत्व नै एनआरएनएलाई सशक्त बनाउने मुख्य आधार हुन्।”
चौंलागाईंका प्रमुख एजेन्डाहरू:
-
वित्तीय पारदर्शिता प्रवर्द्धन – डिजिटल ड्यासबोर्डमार्फत नियमित तथा स्पष्ट प्रतिवेदन सार्वजनिक गर्ने।
-
वित्तीय प्रणाली सुदृढीकरण – एनआरएनएका लागि डिजिटल लेखा प्रणाली तथा अडिटमैत्री उपकरण प्रयोग गर्ने।
-
युवा र नवप्रवर्तन कोष स्थापन – प्रवासमा रहेका नेपाली युवाहरूको परियोजना र स्टार्टअपलाई समर्थन गर्ने कोष स्थापना गर्ने।
-
वैश्विक विश्वास र दक्षता अभिवृद्धि – स्वतन्त्र अडिट तथा निगरानीमार्फत वित्तीय इमानदारी बलियो बनाउने।
-
समुदाय-केन्द्रित निर्णय – सम्पूर्ण आर्थिक निर्णयहरूलाई एनटीको नेपाली समुदायको आवश्यकता अनुरूप बनाउने।
चौंलागाईंले आफू “टीम त्रिलोचन” अन्तर्गत उम्मेदवार बनेको जानकारी दिँदै भने, “हाम्रो टोली राजनीति भन्दा माथि उठेर समुदाय सेवा गर्न प्रतिबद्ध छ। एकता, पारदर्शिता र जवाफदेही कार्यशैली हाम्रो मूल लक्ष्य हो।”
उनले थपे, “साँचो नेतृत्व भनेको सबै उत्तर दिने होइन, सही सोच, सही टोली र सही नियतका साथ अघि बढ्नु हो। तपाईंहरूको साथ र विश्वास पाएमा म एउटा सुन्ने, सिक्ने र नेतृत्व गर्ने कोषाध्यक्ष बन्नेछु।”
चौंलागाईंले अन्त्यमा सबै एनआरएनए एनटी सदस्यहरूलाई आग्रह गर्दै भने, “सेवाका लागि मतदान गर्नुहोस्। विश्वासका लागि मतदान गर्नुहोस्। समुदायका लागि मतदान गर्नुहोस्।”
