पर्थ, वेस्टर्न अष्ट्रेलिया – जुलाई १२, २०२५
गैरआवासीय नेपाली संघ (NRNA) Western Australia को आगामी २०२५–२०२७ कार्यकालका लागि हुने निर्वाचनमा अदिपा खड्काले राज्य समन्वय परिषद् (SCC) सदस्य पदमा उम्मेदवारी घोषणा गरेकी छन्।
विगत केही वर्षदेखि वेस्टर्न अष्ट्रेलियामा बसोबास गर्दै आएकी खड्काले समुदायप्रति आफ्नो समर्पण, प्रतिबद्धता र सामाजिक उत्तरदायित्वको भावना बोकेर यो निर्णय लिएको स्पष्ट पारिन्। “मेरो उम्मेदवारी केवल पदका लागि होइन, समुदायमा सकारात्मक योगदान पुर्याउने अवसरका रूपमा आएको हो,” उनले भनिन्।
उनका मुख्य एजेन्डाहरू यस्ता छन्:
१. मानसिक स्वास्थ्यको प्रवर्द्धन
प्रवासमा बढ्दो मानसिक तनावलाई ध्यानमा राख्दै, खड्काले समुदायमा मानसिक स्वास्थ्यसम्बन्धी चेतना फैलाउने, परामर्श सेवा प्रवाहमा पहुँच सहज बनाउने र खुला संवादको वातावरण सिर्जना गर्ने अठोट लिएकी छन्।
२. नेपाली संस्कृति र पहिचानको संरक्षण
“नेपाली भाषा, कला, संस्कृति र परम्परा हाम्रो जरा हो। यही जरा जोगाएर अघि बढ्नुपर्छ,” भन्दै उनले बालबालिकाहरूका लागि नेपाली भाषा कक्षा, चाडपर्व र सांस्कृतिक कार्यक्रमहरूलाई प्राथमिकता दिने बताइन्।
३. सशक्तीकरण र सामुदायिक सहभागिता
विशेषतः महिला, विद्यार्थी तथा नयाँ आप्रवासीहरूलाई सशक्त बनाउने कार्यक्रम—जस्तै सीप विकास तालिम, व्यावसायिक नेटवर्क, mentorship कार्यक्रमहरू सञ्चालन गरेर उनीहरूलाई आत्मनिर्भर बनाउन क्रियाशील रहने प्रतिबद्धता जाहेर गरिन्।
सहयोगको अपील
“NRNA Western Australia लाई सबैको साझा र गर्व गर्न लायक संस्था बनाउने हाम्रो साझा जिम्मेवारी हो। यो यात्रामा तपाईंहरूको विश्वास, सुझाव र समर्थनको म हार्दिक अपेक्षा गर्दछु,” भनी उनले अन्त्यमा आग्रह गरिन्।
