मेलबर्न, अष्ट्रेलिया – अष्ट्रेलियाको मेलबर्नमा पहिलो पटक इन्द्रजात्रा पर्व भव्य रूपमा मनाउने तयारी गरिएको छ। नेवा गुठी मेलबर्नको आयोजनामा हुने यो ऐतिहासिक कार्यक्रम सेप्टेम्बर ६, २०२५ (शनिबार) का दिन अष्ट्रेलियन नेप्लिज मल्टिकल्चरल सेन्टर (ANMC), डिगर्स रेस्ट, भिक्टोरियामा आयोजना गरिनेछ।
नेपाली समुदायबीच संस्कृति, परम्परा र ऐक्यबद्धता प्रवर्द्धन गर्न आयोजित यो पर्वमा सांस्कृतिक नृत्य, रथयात्रा, देवीदेवताका पूजा, तथा धार्मिक विधिहरू समावेश गरिनेछ।
कार्यक्रम बिहान १० बजेदेखि सुरु भई साँझ ५ बजेसम्म चल्ने जनाइएको छ।
इन्द्रजात्रा पर्व वर्षा र समृद्धिका देवता भगवान इन्द्रको पूजा गरी आभार प्रकट गर्ने परम्परागत पर्व हो, जुन विशेषगरी काठमाडौं उपत्यकामा भव्य रूपमा मनाइन्छ। मेलबर्नमा यस पर्वको आयोजना हुनु नेपाली समुदायका लागि गर्वको कुरा हो।
कार्यक्रमबारे जानकारी दिँदै आयोजक नेवा गुठी मेलबर्नका कार्यकारी सदस्य सुरज प्रधानले भने: “यो हाम्रो समुदायको लागि ऐतिहासिक कदम हो। यो पहिलो प्रयास हो, तर भविष्यमा यसलाई अझ ठूलो, अझ भव्य बनाउने योजना छ।”
नेवा गुठी मेलबर्नका अध्यक्ष माया प्रसाद सुवालले भने: “इन्द्रजात्रा हाम्रो सांस्कृतिक पहिचान र एकताको प्रतीक हो। यो कार्यक्रमले अष्ट्रेलियामा रहेका नेपालीहरूलाई अझ नजिक ल्याउनेछ।”
त्यस्तै, संस्थाका सल्लाहकार रञ्जन वैद्यले यो पर्वलाई अष्ट्रेलियामा नेपाली संस्कृति र परम्परा प्रस्तुत गर्ने अद्वितीय अवसरको रूपमा लिएका छन्। “यस्ता कार्यक्रमहरूले प्रवासी भूमिमा नेपाली सांस्कृतिक सम्पदाको सम्मान र निरन्तरताको ग्यारेन्टी दिन्छन्।”
आयोजकको अनुमान अनुसार, कार्यक्रममा ५,००० भन्दा बढी सहभागी रहनेछ। बालबालिका, युवा, महिला र वृद्धवृद्धा सबैलाई लक्षित कार्यक्रमले बहुसांस्कृतिक समझदारी, सांस्कृतिक आदानप्रदान, र नेपाली पर्यटन तथा संस्कृति प्रवर्द्धनमा समेत योगदान दिने अपेक्षा गरिएको छ।
इन्द्रजात्रा पर्व हिन्दू र बौद्ध परम्पराको मिलन बिन्दु हो। यसले विविधतामा एकता र धार्मिक सहिष्णुताको सन्देश दिन्छ। मेलबर्नमा यसको आयोजना हुनु भनेको नेपाली समुदायको सांस्कृतिक आत्माको जीवन्त प्रदर्शन गर्नु हो।
मेलबर्नवासी नेपाली समुदायलाई एकै थलोमा जोड्ने यो पर्वले प्रवासी भूमिमा सांस्कृतिक उज्यालो फैलाउनेछ भन्ने विश्वास आयोजकले व्यक्त गरेका छन्।
