काठमाडौँ, २०२५ नोभेम्बर १६ – मलेसियामा सडकबाट उद्धार गरिएका नेपाली नागरिक तेजबहादुर माझकोटी आज काठमाडौँ आइपुगेका छन्। त्रिभुवन अन्तर्राष्ट्रिय विमानस्थलमा उनकी श्रीमतीले भावुक रुपमा स्वागत गरेकी थिइन्। करिब १६ वर्षपछि परिवारसँग भएको पुनर्मिलन अत्यन्त हृदयविदारक र अविस्मरणीय रहेको परिवारले जनाएको छ।
तेजबहादुरलाई स्वदेश फर्काउन गैरआवासीय नेपाली संघ (एनआरएनए) मलेसियाले वाटिक एयरको टिकट उपलब्ध गराएको थियो। टिकटको व्यवस्था प्रवासी नेपाली समन्वय समिति (PNCC) को आग्रहमा एनआरएनए मलेसिया अध्यक्ष इन्द्र लिम्बुकी पहलमा गरिएको बताइन्छ।
विगत केही वर्षयता सम्पर्कविहीन रहेका माझकोटीको खोजी कार्य परिवारले पीएनसिसीमार्फत अघि बढाएको थियो। त्यसपछि उनी मलेसियाको बुकित बिन्ताङ क्षेत्रमा फेला परेका थिए। नेपाल दूतावास मलेसियाको समन्वयमा उनको उद्धार गरिएको हो।
उद्धारपछि माझकोटीलाई आकस्मिक आवास र प्राथमिक उपचारका लागि क्रिस्टिना केयर सेन्टरमा राखिएको थियो, जसको सम्पूर्ण खर्च दूतावासले नै व्यहोरेको थियो। साथै, ट्राभल डकुमेन्ट तथा अध्यागमनका सबै प्रक्रिया र खर्च दूतावासले पूरा गरेको दूतावास स्रोतले जनाएको छ।
माझकोटीलाई नेपाल फर्काउने अभियानमा बाग्लुङ सेवा समाज मलेसिया, पीएनसिसी, नेपाल दूतावास मलेसिया, रोजगार सेवा केन्द्र बेसीशहर नगरपालिका, लमजुङका रोजगार संयोजक ईश्वर बहादुर लोहनी तथा आप्रवासी स्रोत केन्द्र लमजुङको महत्वपूर्ण योगदान रहेको थियो।
नेपाल फर्किएपछि उनले भावुक हुँदै भने–
“मलाई उद्धार र सहयोग गर्ने सबै पक्ष—नेपाल दूतावास मलेसिया, बाग्लुङ सेवा समाज, पीएनसिसी—सबैलाई धन्यवाद। अब फेरि विदेश जाने सोच छैन, नेपालमै बसेर कृषि पेशा अपनाउँछु।”
उनी अब परिवारसँग बसेर नयाँ जीवन सुरु गर्ने तयारीमा छन्।
