काठमाडौं। रोजगारीको सिलसिलामा १६ वर्षअघि मलेसिया पुगेका रुपन्देही–सारदा–८ का मानबहादुर परियार पछिल्लो समय गम्भीर स्वास्थ्य समस्याबाट पीडित बने। कम्पनीले प्रतिवद्ध सेवा–सुविधा नदिँदा उनी अवैधानिक स्थिति हुँदै काम गर्न बाध्य भएका थिए। स्वास्थ्य बिग्रिएपछि स्वदेश फर्किन चाहने मानबहादुर आर्थिक अभावका कारण विदेशमै अलपत्र परिरहेका थिए।
यही कठिन घडीमा प्रवासी नेपाली समन्वय समिति (पिएनसीसी) मलेसिया मानबहादुरकाे सबैभन्दा ठूलो आधार बनेर अगाडि आयो।
पिएनसीसी मलेसियाका संयोजक पुर्ण सुब्बाले मानबहादुरको अवस्थालाई नजिकबाट बुझ्दै तत्काल उद्धारकाे पहल गरे। आवश्यक कागजातका लागि नेपाली दूतावाससँग छलफल गरेर ट्राभल डकुमेन्ट निशुल्क उपलब्ध गराउन दूतावासलाई सहजीकरण गरियो।
तर घर फर्किन सबैभन्दा ठूलो चुनौती थियो—हवाई टिकट।
यहीबेला पिएनसीसी संयोजक सुब्बाले गोर्खा एसोसिएसन मलेसियाका अध्यक्ष रोशन रानासँग समन्वय गरे, र अध्यक्ष रानाले आफ्नो सामाजिक जिम्मेवारी र मानवियताको उदाहरण प्रस्तुत गर्दै निशुल्क हवाई टिकट उपलब्ध गराइदिए।
अध्यक्ष राना मलेसियामा बसोबास गर्ने नेपाली समुदायका सफल व्यवसायी मात्र होइनन्, संकटमा परेका नेपालीहरूका लागि विश्वसनीय सहारा हुन्। श्रमजीवी नेपाली दाजुभाइ–दिदीबहिनीको स्वास्थ्य, दुर्घटना तथा अन्य आपत–विपतमा उनले वर्षौंयता निरन्तर सहयोग गर्दै आएका छन्। नेपालमा दैवी विपत्ति परे पनि उनले आर्थिक तथा मानवीय सहयोगद्वारा आफ्नो सामाजिक उत्तरदायित्व प्रमाणित गर्दै आएका छन्।
उनकै उदार सहयोगका कारण मानबहादुर परियार २७ नोभेम्बर २०२५ मा हिमालयन एयरलाइन्समार्फत सुरक्षित रूपमा नेपाल फर्किएका छन्।
विमानस्थलमा उत्रँदा मानबहादुरका आँखाहरू भरिएका थिए—निराशाबाट आशासम्म ल्याइदिएको पिएनसीसी र रोशन रानाप्रति कृतज्ञताका आँसुले।
अध्यक्ष राना भन्छन्—
“विदेशमा कष्टमा परेका नेपाली दाजुभाइ–दिदीबहिनीका लागि जहाँ जे गर्न सकिन्छ, म सधैं अग्रसर रहन्छु।”
पिएनसीसी मलेसियाले भनेको छ—
“प्रवासी नेपालीको पीडा हाम्रो साझा पीडा हो, र सहयोग हाम्रो दायित्व।”
