काठमाडौं, १० साउन । यदि तपाईं जिम जानुहुन्छ वा फिट रहन चाहनुहुन्छ भने प्रोटिन बार तपाईंको लागि एउटा उत्कृष्ट खाजा हुन सक्छ। यसले शरीरलाई आवश्यक प्रोटिनको आपूर्ति गर्नुका साथै ऊर्जा प्रदान गर्न पनि मद्दत गर्छ।
यद्यपि, बजारमा पाइने धेरैजसो प्रोटिन बारहरूमा थपिएको चिनी, स्वाद बढाउने तत्व अर्थात फ्लेभरिङ र अन्य अखाद्य वा कृत्रिम तत्वहरू मिसाइएका हुन्छन्, त्यसैले तिनको दैनिक सेवन सबैका लागि उपयुक्त मानिँदैन। यस्तो अवस्थामा, तपाईं चिनी वा सख्खरको प्रयोग नगरी घरमै स्वस्थ प्रोटिन बारहरू बनाउन सक्नुहुन्छ।
यो बनाउन निकै सजिलो छ र यसमा धेरै समय पनि लाग्दैन। यसको सबैभन्दा राम्रो पक्ष भनेको तपाईंले आफ्नो रुचि अनुसार यसमा ड्राइ फ्रुट्स अर्थात सुक्खा फलफूल र विभिन्न प्रकारका बीउहरू थप्न सक्नुहुन्छ।
घरमै प्रोटिन बार बनाउन आवश्यक सामग्रीहरूः
१ कप ओट्स
१ कप पिनट बटर
१ स्कुप प्रोटिन पाउडर
२ ठूलो चम्चा चिया सिड्स
२ ठूलो चम्चा फ्लेक्स सिड्स
एक चौथाइ कप टुक्रा पारिएको बदाम वा ओखर
२ देखि ३ ठूलो चम्चा दूध
यदि तपाईं चाहनुहुन्छ भने स्वाद बढाउन अलिकति दालचिनीको धुलो वा चिनी नमिसाइएको कोको पाउडर पनि थप्न सक्नुहुन्छ। यसले प्रोटिन बारको स्वाद अझ राम्रो बनाउनेछ।
सबैभन्दा पहिले एउटा ठूलो कचौरामा ओट्स, प्रोटिन पाउडर, चिया सिड्स, फ्लेक्स सिड्स र टुक्रा पारिएका ड्राइ फ्रुट्सहरू राख्नुहोस्। अब, त्यसमा पिनट बटर मिसाउनु होस्। यदि मिश्रण धेरै सुख्खा जस्तो लाग्यो भने थोरै थोरै गर्दै दूध थप्नु होस् र राम्ररी मिसाउनुहोस्। मिश्रण न त धेरै पातलो न त धेरै सुख्खा हुनुपर्छ भन्ने कुरा सुनिश्चित गर्नुहोस्।
अब, एउटा ट्रे वा भाँडोमा बटर पेपर ओछ्याउनु होस्। तयार पारिएको मिश्रणलाई त्यसमा राख्नुहोस् र चम्चा वा हातको मद्दतले राम्ररी थिचेर मिलाउनुहोस् ताकि यो सबैतिर समान रूपमा फैलियोस्। त्यस पछि यसलाई २ देखि ३ घण्टासम्म फ्रिजमा राख्नुहोस्। मिश्रण जमेर कडा भएपछि यसलाई आफूले चाहेको आकारमा काट्नु होस्। तपाईंको स्वस्थ प्रोटिन बार तयार भयो। यसलाई हावा नछिर्ने भाँडोमा राखेर केही दिनसम्म खान सकिन्छ।
यदि तपाईं जिम जानुहुन्छ भने यसलाई व्यायाम सुरु गर्नुभन्दा ३० देखि ६० मिनेट अघि वा व्यायाम सकेपछि सेवन गर्न सक्नुहुन्छ। साथै, हल्का भोक लाग्दा वा ‘जंक फुड’ खान मन लाग्दा यो एउटा राम्रो र स्वस्थ खाजा बन्न सक्छ। यसलाई कार्यालय, कलेज वा यात्रामा लैजान पनि सजिलो हुन्छ।
घरमै बनाइने प्रोटिन बारहरूलाई आफ्नो रुचिअनुसार तयार पार्न सकिन्छ र यिनमा चिनी वा अन्य अस्वस्थकर सामग्रीहरू हुँदैनन्। ओट्स, पिनट बटर, चिया सिड्स र फ्लेक्स सिड्सजस्ता सामग्रीहरूले शरीरलाई प्रोटिन, फाइबर र स्वस्थकर बोसो प्रदान गर्छन्। यीनले पेट भरिएको महसुस गराई लामो समयसम्म भोक लाग्नबाट बचाउँछ।
