क्वालालम्पुर, मङ्गलबार मलेसियाको अध्यागमन विभागले कागजात दुरुपयोग र नक्कली बनाउने दुई समूह — ‘एजन 001’ र ‘अल अमीन’ — माथि छापा मारेर गिरोहलाई पक्राउ गरेको छ।
अध्यागमन विभागका महानिर्देशक दातुक जकारिया शाबान का अनुसार, दुई हप्ता लामो निगरानीपछि विभागले जालान अम्पाङ र जालान किया पेंग क्षेत्रका तीन स्थानमा दिउँसो १२:१० बजे छापा मारी पाँच जना चिनियाँ नागरिक र एक जना म्यानमारका नागरिक (उमेर २८ देखि ४१ वर्ष) लाई पक्राउ गर्दै एजन 001 गिरोहलाई पक्राउ गर्न सफल भएको हो।
सो क्रममा विभागले २३ वटा चिनियाँ राहदानी, १ वटा भानुआटु पासपोर्ट, २ वटा कम्प्युटर CPU, एक थान छाप, ४ मोबाइल फोन, २ वटा रोजगार पास (EP) कार्ड, MDEC आवेदनका २ प्रति, १ चिनियाँ ट्राभल डकुमेन्ट, र ५०,००० रिंग्गिट नगद बरामद गरेको छ।
शाबानका अनुसार, गिरोहका मुख्य योजनाकार चिनियाँ नागरिक नै हुन्, जो अन्य चिनियाँ नागरिकलाई सामाजिक भ्रमण पास र विशेष पास बनाउने सेवा दिँदै आएका थिए। समूहले कार्यालयजस्तो देखिने ठाउँबाट काम गरिरहेको थियो र एक सेवाको लागि १०,००० देखि १५,००० रिंग्गिटसम्म लिने गर्थे। यो गतिविधि पछिल्लो छ महिनादेखि सञ्चालनमा रहेको प्रारम्भिक अनुसन्धानले देखाएको छ।
दोस्रो छापा दिउँसो ५:४२ बजे जालान राजा लौत स्थित तीन व्यापारिक स्थानमा मारिएको थियो, जहाँ तीन जना बंगलादेशी नागरिक (उमेर २४–३२) लाई पक्राउ गरिएको हो। उनीहरू अस्थायी रोजगार भिसा (ePLKS) नक्कली बनाउने कार्यमा संलग्न रहेको पाइयो।
सार्वजनिक जानकारी र तीन हप्ताको अनुसन्धानबाट “अल अमीन” समूहले बंगलादेशी कामदारहरूलाई लक्षित गर्दै नक्कली ePLKS बनाउँदै आएको पत्ता लागेको हो। क्युआर कोड स्क्यान गर्दा पासमा रहेको व्यक्तिको विवरण मिल्दैन र यो समूह मोबाइल पसलहरूबाट अपरेसन चलाइरहेको थियो। एक नक्कली ePLKS को लागि ३० देखि ७० रिंग्गिट लिने गर्थे।
यस कारबाहीमा १८ वटा बंगलादेशी राहदानी, १ पाकिस्तानी पासपोर्ट, ३ ल्यापटप, २ प्रिन्टर, १ CCTV क्यामेरा, DBKL लाइसेन्स, र ३,४४६ रिंग्गिट नगद बरामद गरिएको छ।
पक्राउ परेका सबैलाई थप अनुसन्धानका लागि पुत्राजया इमिग्रेशन डिटेन्सन सेन्टर लगिएको छ। उनीहरूलाई इमिग्रेशन ऐन १९५९/६३, पासपोर्ट ऐन १९६६, र इमिग्रेशन नियमावली १९६३ अन्तर्गत कारबाही गरिनेछ। साथै, ८ जना मलेसियन नागरिकलाई अनुसन्धानमा सहयोगको लागि बोलाइएको छ।
शाबानले भने, “इमिग्रेशन विभागले कागजातको दुरुपयोग र आप्रवासन कानून उल्लंघन गर्ने कुनै पनि गतिविधि विरुद्ध कारबाही अझ तीव्र बनाउनेछ।”
– बर्नामा
