कुवेत सिटी, जुन १ — कुवेतको अल-रेगाई क्षेत्रमा आइतबार बिहान भएको एक भीषण आगलागीमा ६ जनाको मृत्यु भएको छ भने ५ जना गम्भीर घाइते भएका छन्। १५ जनाभन्दा बढीले मध्यमदेखि गम्भीर स्तरको जलनको चोट बेहोरेका छन्।
आगलागी भएको भवनको दुई अपार्टमेन्ट पूर्णरूपमा जलेर नष्ट भएको जनाइएको छ। घटनास्थलमा पुगेका उद्धार टोलीहरूमा शुवैक इन्डस्ट्रियल र अर्डिया केन्द्रका दमकलकर्मीहरू तथा खोज तथा उद्धार टोलीहरू सामेल थिए। आगो नियन्त्रणमा लिइसकेपछि घटनास्थल सम्बन्धित निकायलाई जिम्मा लगाइएको थियो।
फायर ब्रिगेडका एक अधिकारीका अनुसार, उक्त घटनाको दृश्य केही समयअघि माङ्गाफमा भएको आगलागीसँग मिल्दोजुल्दो थियो। भाग्न खोज्ने कतिपय बासिन्दाहरू माथिल्ला तलाबाट हाम फाल्दै देखिएका थिए। उद्धार टोलीले ३ वटा जलेको शव घटनास्थलबाट फेला पारेको पुष्टि गरेको छ। केही घाइतेहरूलाई तत्काल उपचारका लागि नजिकैको अस्पतालमा पठाइएको थियो।
कुवेत फायर फोर्सका जनसम्पर्क निर्देशक ब्रिगेडियर जनरल मोहम्मद अल-घरीबले घटनाको मुख्य कारण सुरक्षाविहीन एकल अप्रवासीहरूको आवास रहेको बताएका छन्। ती आवासहरूमा अग्नि सुरक्षा मापदण्डको उल्लङ्घन गरिएको पुष्टि भएको छ।
फायर फोर्सको सार्वजनिक सम्बन्ध तथा सञ्चार विभागले भवन स्वामिहरूलाई अग्नि सुरक्षा नियम पालना गर्न, साथै बाहिरी बाटोहरू खुला राख्नुपर्ने आग्रह गर्दै जनताको ज्यान र सम्पत्तिको सुरक्षा सुनिश्चित गर्न चेतावनी दिएको छ।
घटनाको विस्तृत कारण पत्ता लगाउन र त्यसले पार्न सक्ने प्रभावबारे हाल आधिकारिक अनुसन्धान भइरहेको छ। मृतक र घाइतेको पूर्ण विवरण सार्वजनिक गरिन बाँकी छ।
