काठमाण्डौं, साउन १४ — पक्षाघातका कारण शारीरिक रूपमा असक्त बनेका नेपाली नागरिक श्री सुजन सार्की तीन वर्ष लामो कठिनाइपछि २०८२ साउन १४ गते काठमाडौंमा आफ्ना परिवारसँग पुनर्मिलन गर्न सफल भएका छन्।
श्री सार्की मलेसियामा सुरक्षा गार्डको रूपमा कार्यरत थिए। तर पक्षाघातका कारण शरीरको बायाँ भागमा समस्या आएपछि उनी उक्त कामलाई निरन्तरता दिन असमर्थ भए। त्यसपछिका दिनहरूमा वैधानिक रूपमा कार्यरत कम्पनी त्यागेपछि, उनी विगत तीन वर्षदेखि कागजातविहीन अवस्थामा मलेसियामा बस्दै आएका थिए।
श्री सार्कीको अवस्थाबारे नेपाली राजदूतावासले जानकारी पाएपछि, तत्कालै पहल गरियो। दूतावासका कर्मचारीले नि:शुल्क एकतर्फी यात्रा कागजात (travel document) जारी गरी, २०८२ साउन १२ गते उनलाई क्वालालम्पुरस्थित मलेसियाको अध्यागमन विभागमा लिएर गएका थिए। त्यहाँ आवश्यक प्रक्रिया पूरा गरी चेकआउट मेमो प्राप्त गर्न सहयोग गरिएको थियो।
दूतावासको पहलसँगै, एक जना दाताले उडान टिकटको खर्च व्यहोर्नु भएको थियो, जसका लागि परिवार अत्यन्त आभारी छ। साथै, नेपालस्थित प्रवासी नेपाली समन्वय समिति (पिएनसीसी)ले श्री सार्कीको पुनर्मिलनको प्रक्रिया सहज बनाउन विशेष भूमिका खेलेको छ।
श्री सार्कीको सुरक्षित र सफल स्वदेश फिर्तीमा संलग्न सबै निकाय, सहयोगी संस्था, र दाताप्रति हार्दिक आभार प्रकट गरिएको छ।
