काठमाडौँ, कात्तिक २४ गते – आइसिसी महिला टी–२० विश्वकप छनोटको तयारीस्वरूप नेपाली महिला राष्ट्रिय क्रिकेट टोली भारत भ्रमणमा जाने भएको छ।
नेपाल क्रिकेट संघ (क्यान) का अनुसार टोलीले नोभेम्बर १३ देखि १९ तारिखसम्म भारतमा ६ वटा अभ्यास खेल खेल्ने कार्यक्रम तय भएको छ।
नेपालले नोभेम्बर १३ र १७ मा राजस्थान, १४ र १८ मा उत्तराखण्ड क्रिकेट संघ तथा १५ र १९ मा बंगालसँग खेल्नेछ। यी सबै खेलहरू उत्तराखण्डको चिदरवालास्थित आयुष क्रिकेट एकेडेमीमा हुने बताइएको छ।
क्यानले भारत भ्रमणका लागि इन्दु बर्माको कप्तानीमा १४ सदस्यीय टोली घोषणा गरेको छ। टोलीमा कप्तान बर्मासँगै रुविना क्षेत्री, सीता राना मगर, पूजा महतो, कविता कुँवर, अस्मिता कर्माचार्य, इश्वरी विष्ट, साना प्रविन, रोमा थापा, मनिषा उपाध्याय, सीमाना केसी, ममता चौधरी, विन्दु रावल र लक्ष्मी साउद रहेका छन्।
क्यानका अनुसार यो अभ्यास शृङ्खला आगामी टी–२० विश्वकप छनोटका तयारीका लागि अत्यन्तै महत्त्वपूर्ण हुनेछ। भारतीय टोलीहरूसँगको प्रतिस्पर्धाबाट नेपाली टोलीले अनुभव र आत्मविश्वास दुवै हासिल गर्ने अपेक्षा गरिएको छ।
