रौतहट, ६ साउन। नेपाली कांग्रेस रौतहटले ४४औँ बीपी स्मृति दिवसको अवसरमा ‘नवीन परिस्थिति, नवीन संकल्प, नवीन अभियान’ विषयक विचार गोष्ठी तथा जरा अभियानको समापन कार्यक्रम सम्पन्न गरेको छ।
कार्यक्रम गरुडास्थित होटल एएन प्लाजामा जिल्ला सभापति सुनिल कुमार यादव ९जितेन्द्र० को सभापतित्व तथा नेपाली कांग्रेसका नेता प्रमोदहरि गुरागाईं को प्रमुख आतिथ्यमा सम्पन्न भएको हो।
कार्यक्रममा नेपाली कांग्रेसका विभिन्न तहका नेता, जनप्रतिनिधि, भ्रातृ तथा शुभेच्छुक संस्थाका प्रतिनिधि र कार्यकर्ताको उल्लेखनीय सहभागिता रहेको थियो।
वक्ताहरूले नेपाली कांग्रेसका संस्थापक नेता तथा नेपालमा प्रजातान्त्रिक आन्दोलनका प्रमुख अभियन्ता बीपी कोइरालाको राजनीतिक दर्शन, राष्ट्रिय एकता, लोकतान्त्रिक मूल्य–मान्यता र समाजवादको अवधारणालाई वर्तमान राजनीतिक परिवेशमा अझ सान्दर्भिक रूपमा आत्मसात् गर्नुपर्ने आवश्यकता औँल्याएका थिए।उनीहरूले पार्टीलाई जनतासँग थप जोड्ने, संगठनलाई तल्लो तहसम्म सुदृढ बनाउने तथा जनविश्वास पुनः स्थापित गर्ने अभियानलाई निरन्तरता दिनुपर्नेमा जोड दिएका थिए।
कार्यक्रममा पछिल्लो समय सञ्चालन गरिएको ‘जरा अभियान’ ले संगठनलाई गाउँ–टोलसम्म पु¥याउन र कार्यकर्ताबीच नयाँ ऊर्जा सिर्जना गर्न महत्वपूर्ण भूमिका खेलेको भन्दै यसको उपलब्धिबारे पनि समीक्षा गरिएको थियो। सहभागीहरूले संगठन विस्तारसँगै जनताका समस्या र अपेक्षालाई केन्द्रमा राखेर राजनीतिक गतिविधि अघि बढाउनुपर्ने धारणा व्यक्त गरेका थिए।
यो कार्यक्रम केवल स्मृति दिवसमा सीमित देखिँदैन। पछिल्लो राजनीतिक परिवेशमा जनाधार सुदृढ गर्ने चुनौती सामना गरिरहेको नेपाली कांग्रेसले बीपीको विचारलाई संगठन पुनर्जीवनसँग जोड्ने प्रयास गरेको सन्देश यस कार्यक्रमबाट दिएको देखिन्छ।
विशेषगरी ‘नवीन परिस्थिति, नवीन संकल्प, नवीन अभियान’ भन्ने नाराले बदलिँदो राजनीतिक प्रतिस्पर्धा, युवापुस्ताको अपेक्षा र संगठनात्मक पुनर्संरचनालाई सम्बोधन गर्ने संकेत गरेको छ। ‘जरा अभियान’को समापनसँगै अब कांग्रेसले त्यसबाट प्राप्त उपलब्धिलाई व्यवहारमा रूपान्तरण गर्न सके मात्र यसको प्रभाव दीर्घकालीन हुने राजनीतिक विश्लेषकहरूको बुझाइ छ।
कार्यक्रमले बीपीको विचारप्रति प्रतिबद्धता दोहोर्याएको मात्र नभई आगामी दिनमा संगठनलाई जनतामाझ अझ प्रभावकारी रूपमा स्थापित गर्ने प्रतिबद्धता पनि व्यक्त गरेको सहभागीहरूको भनाइ थियो।
