रौतहट, २१ असार। रौतहटको गुजरा नगरपालिका-३ र ४ अन्तर्गत पर्ने धनसर-जंगलसहिया सडकखण्डमा सडकछेउ बाक्लो रूपमा फैलिएको जंगली झारका कारण आवागमन जोखिमपूर्ण बन्दै गएको छ।
सडकको दुवैतर्फ उम्रिएको झारले मोड तथा साँघुरा स्थानमा दृश्यता कम हुँदा दुर्घटनाको सम्भावना बढेको भन्दै स्थानीयले तत्काल सरसफाइ गर्न माग गरेका छन्।
समाजसेवी दीपेन्द्र नेपालले सामाजिक सञ्जाल फेसबुकमार्फत गुजरा नगरपालिकाका प्रमुख सन्तलाल चौधरी, उपप्रमुख रत्ना लामा तथा सम्बन्धित वडा नम्बर ३ र ४ का जनप्रतिनिधिहरूको ध्यानाकर्षण गराउँदै सडक छेउको झार तत्काल हटाउन आग्रह गरेका हुन्। उनले सर्वसाधारणले दैनिक प्रयोग गर्ने यस सडकको अवस्था सुधार्न ढिलाइ गर्न नहुने बताएका छन्।
उनका अनुसार विद्यालय जाने विद्यार्थी, किसान, व्यापारी तथा अन्य यात्रुहरू यही सडकमा निर्भर छन्। तर, झारले सडक ढाक्न थालेपछि विपरीत दिशाबाट आउने सवारीसाधन समयमै देख्न नसकिने अवस्था सिर्जना भएको छ, जसले विशेषगरी मोटरसाइकल चालकलाई बढी जोखिममा पारेको छ।
स्थानीयवासीले वर्षायाम सुरु भएसँगै झार तीव्र रूपमा फैलिने भएकाले समयमै सरसफाइ नगरिए दुर्घटनाका घटना बढ्न सक्ने चिन्ता व्यक्त गरेका छन्। उनीहरूले नगरपालिकाले नियमित रूपमा सडकछेउको सरसफाइ, घाँस–झार व्यवस्थापन र सडक सुरक्षा कार्यक्रमलाई प्राथमिकतामा राख्नुपर्ने बताएका छन्।
स्थानीय तहले सडक निर्माणसँगै त्यसको नियमित मर्मत र सरसफाइलाई पनि समान प्राथमिकता दिनुपर्ने हुन्छ। सडकछेउको झारले दृश्यता घटाउँदा सवारी दुर्घटनाको जोखिम मात्र बढ्दैन, आपत्कालीन सेवाको आवागमनसमेत प्रभावित हुन सक्छ। नागरिकले बारम्बार उठाउँदै आएको यस्तो आधारभूत समस्याको समयमै समाधान गर्न सके स्थानीय सरकारप्रति जनविश्वास अझ मजबुत बन्ने देखिन्छ।
