क्वालालम्पुर, मलेसियाको मानव संसाधन मन्त्री स्टेभन सिमले घोषणा गरेअनुसार, अबदेखि विदेशी कामदारहरूले केवल पाँच औपचारिक क्षेत्रहरूमा मात्र रोजगारी परिवर्तन गर्न पाउनेछन्। यी क्षेत्रहरूमा निर्माण, उत्पादन, कृषि, बगैंचा (प्लान्टेशन) र सेवा क्षेत्र समावेश छन् ।
नयाँ दिशानिर्देशहरू चाँडै जारी गरिनेछन्, जसमा रोजगारी परिवर्तनको न्यूनतम अवधि, कामदारको सहमति र समावेश गरिने क्षेत्रहरूबारे स्पष्टता हुनेछ। सिमले भने, “यो कदमले देशको श्रम मागलाई सम्बोधन गर्न र नयाँ विदेशी कामदारहरू भर्ना गर्ने आवश्यकतालाई घटाउन मद्दत पुर्याउनेछ” ।
यसअघि, विदेशी कामदारहरूलाई केवल एउटै क्षेत्रमा मात्र रोजगारदाता परिवर्तन गर्न अनुमति थियो, त्यो पनि कम्पनी पुनःसंरचना, बन्द वा विस्तारजस्ता अवस्थाहरूमा मात्र। नयाँ नीतिले अब विभिन्न क्षेत्रहरूमा पनि रोजगारी परिवर्तन गर्न सक्ने सुविधा प्रदान गर्नेछ, जसले अवैध रूपमा कामदारहरूलाई अन्य क्षेत्रमा स्थानान्तरण गर्ने प्रवृत्तिलाई रोक्नेछ र कोटा सीमाभन्दा बाहिर कामदार भर्ना नगर्ने सुनिश्चित गर्नेछ ।
तर, यो नीति घरेलु कामदारहरूमा लागू हुने छैन, किनभने उनीहरू अनौपचारिक क्षेत्रअन्तर्गत पर्छन्। सिमले स्पष्ट पारे, “घरेलु कामदारहरूमा यो निर्णय लागू हुनेछैन” ।
यो नीतिगत परिवर्तनले सरकार, रोजगारदाता र विदेशी कामदारहरू सबैलाई लाभ पुर्याउने अपेक्षा गरिएको छ। साथै, यो कदम अन्तर्राष्ट्रिय श्रम संगठनहरूले सिफारिस गरेका अभ्यासहरूसँग मेल खानेछ र अन्य विकसित राष्ट्रहरूले अपनाएका छन् ।
